ოდესაში ქართველი ,,კანონიერი ქურდის“ დაკავებას მიხეილ სააკაშვილი ეხმაურება

საქართველოს ყოფილი პრეზიდენტი, ოდესის ოლქის გუბერნატორი მიხეილ სააკაშვილი ქართველი ,,კანონიერი ქურდის“ დავით გერლიანის დაკავებას თავის ოფიციალურ Facebook გვერდზე ეხმაურება. მისი თქმით, გერლიანის, იგივე "დათო სვანის" კვალზე, ოდესის ოლქის პოლიციის ხელმძღვანელი გიორგი ლორთქიფანიძე გავიდა. 

"გიორგი ლორთქიფანიძე, ოდესის პოლიციის ხელმძღვანელად დანიშვნის დღიდანვე, კანონიერი ქურდების პრობლემით დაკავდა. დიდი ხნის განმავლობაში ისინი ოლქში გამოჩენას ვერ ბედავდნენ. გიორგიმ ცოტა ხნის წინ ჯიბის ქურდების ჯგუფი აიყვანა, რომელიც საქართველოდან გადმოვიდა და ქართველ კანონიერ ქურდზე დავით გერლიანზეც გავიდა, რომელიც დააკავეს და დეპორტაციით საქართველოში გადაიყვანეს.

საქმე ისაა, რომ საქართველოში თავის დროზე, ჩემ მიერ ინიცირებული კანონი მოქმედებს, რომლის მიხედვით, განურჩევლად იმისა, პოლიციელი დააკავებს, თუ არა, კანონიერი ქურდი ავტომატურად ციხეში ხვდება. მსგავსი პროექტი უკვე დიდი ხანია, რაც უკრაინის უმაღლეს რადაშია გაჭედილი", - წერს მიხეილ სააკაშვილი თავის Facebook გვერდზე.