გია ცერცვაძე რუსეთის მხრიდან ქართველი ჯარისკაცების შესაძლო გატაცებაზე საუბრობს

„შეიძლება ასეც მოხდეს, რომ გაიტაცონ, მე არ გამოვრიცხავ მაგას,“ - ასე აფასებს გია ცერცვაძე რუსეთის მიერ საქართველოდან ჯარისკაცების გატაცების შესაძლო გეგმას. მისი თქმით, რუსეთმა უკვე დაიწყო ნადირობა ხალხზე, რომლებიც  რუსეთის წინააღმდეგ იბრძვიან.

ამის შესახებ მან გადაცემა არჩევანში უკრაინიდან ჩართვისას ისაუბრა. 

გიორგი ცერცვაძე უკრაინაში პოლიტიკურ თავშესაფარს ითხოვს. გადაწყვეტილება უკრაინამ თებერვალში უნდა მიიღოს. გია ცერცვაძე აცხადებს, რომ სახელმწიფო მისი თავის რუსეთის ფედერაციისთვის გადაცემას გეგმავდა.

„რაც მოხდა ჩემს სიტუაციაში, ანუ ის, რომ მე გადამცეს სხვა ქვეყანას, არ გამაფრთხილეს აეროპორტში, რაც შსს-ს და მესაზღვრეებს უნდა გაეკეთებინა, გამომიშვეს ქვეყნიდან იმ მიზნით რომ სხვა ქვეყანა გადაცემდა რუსეთის ფედერაციას,“ - აცხადებს ცერცვაძე.

გიორგი ცერცვაძის თქმით, საქართველოში რუსეთზე მომუშავე ჯგუფი არსებობს.

„მე ვგულისხმობ იმას, რომ საქართველოში არსებობს ძალიან განვითარებული ქსელი, რომელიც რუსეთზე მუშაობს. რომლებიც არიან მაღალი დონის პროფესიონალები და აკეთებენ ყველაფერს იმას, რომ ზიანი მიაყენონ საქართველოს როგორც პოლიტიკური, ისე სამხედრო ზიანი,“ - აცხადებს გია ცერცვაძე და სწორედ ამ კონტექსტში საუბრისას ამბობს, რომ არც იმას გამორიცხავს, საქართველოდან ქართველი სამხედროების გატაცების გეგმა მუშავდებოდეს.