მიხეილ ჯანელიძე ოკუპირებულ აფხაზეთში მცხოვრები ქართველებისთვის ახალი სტატუსის მინიჭების საკითხს ეხმიანება

საქართველოს საგარეო საქმეთა მინისტრმა მიხეილ ჯანელიძემ ოკუპირებულ აფხაზეთში საოკუპაციო რეჟიმის მიერ ე.წ. ბინადრობის მოწმობების გაცემის დაწყებასთან დაკავშირებით განაცხადა, რომ საქართველო მაქსიმალურად ახდენს ოკუპირებულ რეგიონებში ადამიანის უფლებების დარღვევის ფაქტებზე საერთაშორისო თანამეგობრობის მობილიზებას.

"მნიშვნელოვანია, რომ მაქსიმალურად შეიზღუდოს ყველა ის დისკრიმინაციული ქმედება და პოლიტიკა, რომელსაც ახორციელებს საოკუპაციო რეჟიმი. ამისთვის ჩვენ  ვახდენთ ჩვენი პარტნიორი ქვეყნების მობილიზებას და ამის ერთ-ერთი დასტურია ის რეზოლუცია, რომელიც მიღებული იქნა გაეროს ადამიანის უფლებების საბჭოს მიერ. რეზოლუციაში საბჭო და საბჭოს წევრი ქვეყნები მოუწოდებენ დაუყოვნებლივ იქნას დაშვებული ადამიანის უფლებათა უმაღლესი კომისარი ოკუპირებულ ტერიტორიებზე, რათა შეფასებული იქნას ადამიანის უფლებების მდგომარეობა და მოხდეს თითოეული მცხოვრების უფლების დაცვა, განსაკუთრებით შეიზღუდოს ის ეთნიკური დისკრიმინაცია, რომელიც დღეს ხორციელდება", - განაცხადა საქართველოს საგარეო საქმეთა მინისტრმა მიხეილ ჯანელიძემ. 

ოკუპირებული აფხაზეთის დე ფაქტო ხელისუფლების გადაწყვეტილებით, გალის რაიონში მცხოვრებ ქართველებს ახალი სამართლებრივი სტატუსი მიენიჭათ. ამ გადაწყვეტილების მიხედვით, გალის რაიონის მოსახლეობას დროებითი მცხოვრების სტატუსის აღმნიშვნელი დოკუმენტი გადაეცემათ.