უიშვიათესი ბრილიანტი ”ვარდისფერი ვარსკვლავი” 71 მლნ დოლარად გაიყიდა

უიშვიათესი ბრილიანტი ”ვარდისფერი ვარსკვლავი” აუქციონების ისტორიაში ყველაზე ძვირად გაიყიდა. 59,6-კარატიანი ქვა ჰონკონგში Sotheby's-ის აუქციონზე 71 მლნ დოლარად გაიყიდა.

აუქციონის სახლის ინფორმაციით, ის ჰონკონგურმა ფირმამ Chow Tai Fook Jewellery-მ შეიძინა. ვაჭრობა სულ ხუთ წუთს გაგრძელდა.

ძვირფასი ქვა სამხრეთ აფრიკის რესპუბლიკაში De Beers-ის საბადოზე 1999 წელს აღმოაჩინეს. აუქციონზე მისი საწყისი ფასი 56 მლნ დოლარს შეადგენდა. დამუშავებამდე მისი წონა 132,5 კარატს აღწევდა.

2013 წელს ჟენევის აუქციონზე ”ვარდისფერი ვარსკვლავის” ყიდვა 83 მლნ დოლარად სურდათ, მაგრამ პოტენციურმა მყიდველმა თანხის გადახდა განსაზღვრულ ვადებში ვერ შეძლო და ოპერაციის ანულირება მოხდა.