ირაკლი ალასანიას ყოფილი მოადგილე სუს-ის უფროსის მოადგილედ დაინიშნა

სახელმწიფო უსაფრთხოების სამსახურის ვებგვერდზე, სუს-ის ხელმძღვანელის ვახტანგ გომელაურის მოადგილეების ჩამონათვალში ალექსანდრე ბატიაშვილიც ფიგურირებს.

მისი დანიშვნის გადაწყვეტილების შესახებ ოფიციალური განცხადება ჯერ არ გაკეთებულა. ბატიაშვის საჯარო სამსახურში მუშაობის რამდენიმე წლიანი გამოცდილება აქვს. 

ალექსანდრე ბატიაშვილი მუშაობდა თავდაცვის სამინისტროსა და შინაგან საქმეთა სამინისტროში. ის თავდაცვის ყოფილი მინისტრის ირაკლი ალასანიას მოადგილე იყო. შსს-ში მუშაობის დროს კი მაშინდელი მინისტრის ირაკლი ღარიბაშვილის მოადგილე იყო.

2003-2004 წლებში უშიშროების სამინისტროს თბილისის მთავარი სამმართველოს უფროსის მოადგილის თანამდებობა ეკავა. 2004 წელს საქართველოს იუსტიციის სამინისტროს სსიპ ექსპერტიზისა და სპეციალურ გამოკვლევათა ცენტრის დირექტორი იყო. მოგვიანებით, საქართველოს იუსტიციის სამინისტროს სსიპ თანამდებობის პირთა ქონებრივი და საფინანსო მდგომარეობის საინფორმაციო ბიუროს თავმჯდომარის თანამდებობა ეკავა.