ბრიტანეთის თავდაცვის მინისტრის გადადგომა სექსუალურ სკანდალთან არის დაკავშირებული

დიდი ბრიტანეთის თავდაცვის მინისტრი სერ მაიკლ ფელონი თანამდებობიდან გადადგა. ფელონის თქმით, წარსულში მისი ქმედება არ შეესაბამებოდა სამხედროებისთვის მიღებულ  სტანდარტებს.

 „ბი ბი სის“ წყაროს ცნობით, ეს გადაწყვეტილება არ უკავშირდება მისი მისამართით ახალ ან რაიმე კონკრეტულ პრეტენზიებს.

უკანასკნელ ხანებში ბრიტანეთის პარლამენტში ფართოდ განიხილება სექსუალური შევიწროების საკითხი.

„უკანასკნელი დღეების განმავლობაში გავრცელდა მტკიცებულებები პარლამენტის წევრებისა და მათ შორის წარსულში ჩემი ქმედებების შესახებ. მათი უმეტესობა ტყუილია, მაგრამ ვაღიარებ, რომ წარსულში არ შევეფერებოდი მაღალ მოთხოვნებს, რომლებსაც ვაკისრებთ შეიარაღებულ ძალებს, რომელსაც პატივი მაქვს წარმოვადგენდე“, - ნათქვამია ფელონის განცხადებაში.   

შეგახსენებთ, ცოტა ხნის წინ მაიკლ ფელონმა აღიარა, რომ ერთხელ ჟურნალისტ ჯულია ჰართლი-ბრიუერთან თავს თამამად მოქცევის უფლება მისცა და აღნიშნა, რომ თავისი საქცილის გამო დიდი ხნის წინ ბოდიში უკვე მოიხადა. 

რადიოწამყვანმა და ადრეულ წლებში გაზეთ Sunday Express-ის პოლიტიკურმა მიმომხილველმა ინციდენტის შესახებ ისაუბრა, რომელიც დიდი ხნის წინ მოხდა.

მისი თქმით, კონსერვატიული პარტიის კონფერენციის დროს გამართულ ვახშამზე მამაკაცი დაჟინებით ცდილობდა ჟურნალისტის მუხლზე ხელის დადებას, რის შემდეგაც ქალი  დაემუქრა, რომ კიდევ ერთი მცდელობის შემდეგ სახეზე  დაარტყამდა. ტაბლოიდმა Sun-მა მამაკაცის ვინაობა სწრაფად დაადგინა, ის თავდაცვის ახლანდელი მინისტრი სერ მაიკლ ფელონი აღმოჩნდა.