შტატის შემცირება მხოლოდ სპორტის სამინისტროს არ შეეხება - მიხეილ გიორგაძე

,,შტატის შემცირება მხოლოდ სპორტის სამინისტროს არ შეეხება", - ამის შესახებ კულტურისა და ძეგლთა დაცვის მინისტრმა მიხეილ გიორგაძემ განაცხადა და აღნიშნა, რომ ადმინისტრაციულ ნაწილში ოპტიმიზაცია გარდაუვალია.

მინისტრის განცხადებით, სავარაუდოდ, მთავრობის მომავალ სხდომაზე მინისტრები, რომელთა სამინისტროებსაც სხვა უწყებები დაემატა, კონკრეტულ გეგმას წარადგენენ.

,,შეთავაზებული ცვლილებები გულისხმობს გარკვეული სამინისტროების შერწყმას, რაც ადმინისტრაციული მიმართულებით ხარჯებზე პოზიტიურად აისახება.

თითოეული სამინისტრო ოპტიმიზაციის გეგმას წარადგენს მთავრობაზე, რომლის შემდეგაც ეს კონკრეტული ციფრები იქნება ცნობილი. ვფიქრობ, მთავრობის შემდეგი სხდომისთვის თითოეული მინისტრი, იქნება მზად იმისთვის, რომ უკვე კონკრეტული გეგმა მთავრობას წარუდგინოს.

მე სულაც არ ვგულისხმობ შტატის შემცირებაში მხოლოდ სპორტის სამინისტროს, ჩვენ თუ ერთიანი უწყების ლოგიკაში განვიხილავთ ამას, ორივე საშტატო განრიგს თავიდან გადავხედავთ. 140 თანამშრომელი გვყავს ჩვენ და 106, ან 116-სპორტის სამინისტროს“,-აღნიშნა  მიხეილ გიორგაძემ.

შეგახსენებთ, კულტურისა და ძეგლთა დაცვის სამინისტროს უერთდება სპორტისა და ახალგაზრდობის საქმეთა სამინისტროს სპორტის კომპონენტი.