4, 5 მლნ ლარი დაიხარჯა სდსს-ს მიერ და არა პრეზიდენტის ადმინისტრაციის მხრიდან - გიორგი აბაშიშვილი

ხარჯები გაწეულია  სდსს-ს მიერ და არა პრეზიდენტის ადმინისტრაციის მხრიდან, - განაცხადა პრეზიდენტის ადმინისტრაციის უფროსმა,  პრეზიდენტის რეზიდენციის ხარჯებთან დაკავშირებით. სდსს-ს მონაცემებით,  2015-2016 წლებში პრეზიდენტის რეზიდენციის შენახვისთვის 4 541 589 ლარი დაიხარჯა. 

„როგორც ჩანს, დაანონსდა პრეზიდენტ მარგველაშვილის წინააღმდეგ ბრძოლის ახალი სეზონი. წარმოდგენილი ციფრები, წარმოდგენილი ხარჯები არის გაწეული სახელმწიფო დაცვის სამსახურის მიერ და არა პრეზიდენტის ადმინისტრაციის მიერ. შესაბამისად, ეს ციფრები იყო სრულიად სიურპრიზი ჩვენთვის. ისევე როგორც საზოგადოებას აინტერესებს, ჩვენც ძალიან გვაინტერესებს თითოეული თეთრის ეფექტიანობა, რომელიც დაცვის სამსახურის მიერ არის გაწეული,“ - განაცხადა გიორგი აბაშიშვილმა.

მისივე თქმით, პრეზიდენტის ინსტიტუტი არის ერთადერთი ინსტიტუტი, რომელიც ვერ კონტროლდება "ქართული ოცნების" მიერ. შესაბამისად, მისი განმარტებით, საზოგადოებისთვის ნათელია, საიდან მოდის და რა მოტივით ვრცელდება ეს ინფორმაცია.