ატენის ქუჩის მცხოვრებლების საპროტესტო აქცია გრძელდება

ატენის ქუჩის მცხოვრებლები დედაქალაქის მერიის წინ, კორპუსის მშენებლობის ნებართვის შეჩერების მოთხოვნით, საპროტესტო აქციას მართავენ.

მათი თქმით, ატენის ქუჩა არის ზედმეტად პატარა იმისათვის, რომ 27-სართულიანი მონსტრი დაემატოს. 

მერიის წინ შეკრებილნი არიან ის ადამიანებიც, რომლებიც კორპუსში ბინების მიღებას ელოდებიან და აცხადებენ, რომ პირები, რომლებიც მშენებლობას ეწინააღმდეგებიან, 3 მილიონის აღების შემთხვევაში, მზად არიან მშენებლობა აღარ გააპროტესტონ. 

პარალელურად, მერიაში ატენის ქუჩის მცხოვრებლების, მათი ადვოკატისა და არქიტექტურის სამსახურის წარმომადგენლების მონაწილეობით ატენის ქუჩაზე მდებარე სადავო კორპუსთან დაკავშირებით ადმინისტრაციული სარჩელის განხილვა მიმდინარეობს.

როგორც ატენის ქუჩის მცხოვრებლების ადვოკატმა, დიმიტრი გაბუნიამ შეხვედრის დაწყებამდე განაცხადა, დღეს გადაწყდება მშენებლობის შეჩერების ან ბათილად ცნობის საკითხი.

"ჩვენ კატეგორიულად მივითხოვთ დღეს სულ მცირე მშენებლობის ნებართვის შეჩერებას. არსებითად დღეს საქმე გადაწყდება. დღეს ორიდან ერთი პასუხი გვექნება. ჩვენ ვითხოვთ, რომ ჯერ შეჩერდეს მშენებლობა და ბათილად იქნეს ცნობილი მშენებლობის ნებართვა და ამ ფორმით არ აშენდეს ეს ნაგებობა“, – განაცხადა ადვოკატმა.