„მეტროპოლიტენ-ოპერის“ დირიჟორი სექსუალური შევიწროვების გამო დაითხოვეს

ცნობილი ამერიკელი დირიჟორი ჯეიმს ლივაინი „მეტროპოლიტენ-ოპერიდან“ მას შემდეგ გაათავისუფლეს, რაც გამოძიებამ დაამტკიცა მისი დანაშაული არასრულწლოვანის სექსუალური შევიწროების საქმეში. New York Times-ის ცნობით, საუბარია 30 წლის წინ მომხდარ ინციდენტზე.

პოლიციის ცნობით, მამაკაცი, რომლის ვინაობაც არ სახელდება, აცხადებს, რომ დირიჟორი მას სექსუალურად ავიწროებდა, როდესაც ის მოზარდი იყო. მისი თქმით, რამდენიმე წლის განმავლობაში ლივაინს მასთან სექსუალური კავშირი ჰქონდა. ძალადობის შესახებ პირველად მამაკაცმა 1993 წელს განაცხადა, თუმცა მხოლოდ ცოტა ხნის წინა გააცნობიერა, რომ ლივაინის მხრიდან ძალადობამ მის ცხოვრებაზე ნეგატიური გავლენა მოახდინა.

შიდა გამოძიება ჩაატარა ოპერის თეატრმაც. შედეგად გაირკვა, რომ მამაკაცი დირიჟორის ერთადერთი მსხვერპლი არ იყო და ლივაინი დამწყებ არტისტებზე ხშირად ძალადობდა.

74 წლის ჯეიმს ლივაინს „მეტროპოლიტენ-ოპერის“ მუსიკალური დირექტორის პოსტი 40 წლის განმავლობაში ეკავა.