ოთარ დანელია გურიაში ციტრუსის რეალიზების პროცესს გაეცნო

სოფლის მეურნეობის მინისტრი ოთარ დანელია გურიის რეგიონის სახელმწიფო რწმუნებულ-გუბერნატორთან, გია სალუქვაძესთან ერთად, ოზურგეთის მუნიციპალიტეტის სოფელ ნატანებში,, ქართული სუბტროპიკული ხილის კომპანიაში“იმყოფებოდა და ციტრუსის მიღების პროცესს ადგილზე გაეცნო. საწარმოში ციტრუსის ჩაბარება-რეალიზაცია აქტიურად მიმდინარეობს. 

,,ქართული სუბტროპიკული ხილის კომპანია“ 2013 წლის ბოლოს გაიხსნა. კომპანიამ სოფლის მეურნეობის სამინისტროს შეღავათიანი აგროკრედიტის პროექტის ფარგლებში 600,000 აშშდოლარის სესხი აიღო. საწარმოში ციტრუსის გადამამუშავებელ-დამხარისხებელი ხაზები და პროდუქციის შესანახი მაცივარ - საწყობი მოეწყო. მიმდინარე წელს საწარმოს პლასტმასის ყუთების წარმოების ახალი ხაზი დაემატა. საწარმოში ჯამში 1 მლნ აშშ დოლარის ინვესტიცია განხორციელდა.

,,გურიის რეგიონში საკმაოდ  გამართულად მიმდინარეობს  მანდარინის ჩაბარების პროცესი.  აღსანიშნავია, რომ ციტრუსის დამუშავება  უმაღლესი ტექნოლოგიებით ხორციელდება და უკვე  ევროპული სტანდარტის პროდუქცია გადის საქართველოდან“, - აღნიშნა ოთარ დანელიამ.

,,ქართული სუბტროპიკული ხილის კომპანია“ მიმდინარე სეზონზე  3-4 ათასი ტონა  ციტრუსის გადამუშავებას და ექსპორტს გეგმავს. საწარმოში დასაქმებულია 200-მდე ადგილობრივი მცხოვრები. წარმოებული პროდუქციის რეალიზაცია ადგილობრივ ბაზარზე და დსთ-სქვეყნებშ იხდება.

როგორც საწარმოს დირექტორმა აღნიშნა, მოსახლეობისგან ციტრუსის მიღება აქტიურად მიმდინარეობს.  კომპანია მოსახლეობას ე.წ სამუშაო ყუთებით  უზრუნველყოფს და ციტრუსის ტრანსპორტირების ხარჯებსაც უნაზღაურებს.   ,,ჩვენთვის მთავარია ექსპორტზე ხარისხიანი პროდუქცია გავიდეს. ხდება საწარმოში ციტრუსის რეცხვა, დაკალიბრება,  პარაფინირება (ე.წ. გასანთვლა) და ევროპული სტანდარტით შეფუთვა ხდება. კონკურენცია ძალიან მაღალია, მაგრამ ვცდილობთ,  ნაბიჯ-ნაბიჯ წავიდეთ წინ და ჩვენი პროდუქცია ევროპულ ბაზარზეც გავიტანოთ“,  - აღნიშნა საწარმოს დირექტორმა, დავით სიხარულიძემ.

როგორც გურიის რეგიონის სახელმწიფო რწმუნებულმა-გუბერნატორმა, გია სალუქვაძემ აღნიშნა, წელს გურიის რეგიონში დაახლოებით 12-დან 15ათას ტონამდე მოსავალს ელოდებიან. საწარმოები მოსახლეობისგან ციტრუსს  შეუფერხებლად იბარებენ და შესაბამისად, ამ მიმართულებით გურიის რეგიონში პრობლემები არ იქნება.

,,ქართული სუბტროპიკული ხილის კომპანაიში“ ციტრუსის მიღება-გადამუშავების  პროცესს სოფლის მეურნეობის მინისტრის მოადგილე ლევან დავითაშვილი, სოფლის მეურნეობის პროექტების მართვის სააგენტოს დირექტორი მარიანა მორგოშია და ადგილობრივი თვითმმართველობის წარმომადგენლები გაეცნენ.