სოფელ იყალთოში „ქვევრის სახლი“-ს მშენებლობა მიმდინარეობს

საქართველოს რეგიონული განვითარებისა და ინფრასტრუქტურის სამინისტროს  მუნიციპალური განვითარების ფონდის აღმასრულებელმა დირექტორმა  ჯუანშერ ბურჭულაძემ, სოფელ იყალთოში ქვევრის  სკოლა-სახელოსნოს სამშენებლო სამუშაოები დაათვალიერა. 

სამსართულიანი ადმინისტრაციული შენობა და ერთსართულიანი ქვევრის დასამზადებელი საამქრო იყალთოს მონასტრის მიმდებარე ტერიტორიაზე განთავსდება. გარდა ამისა, ობიექტს ექნება მუზეუმი, სადაც უძველესი თიხის ჭურჭელი გამოიფინება. „ქვევრის სახლში“, ასევე,  იქნება ბიბლიოთეკა და ინტერნეტ-კაფე. ამასთან, ტურისტებს საშუალება ექნებათ, ისწავლონ და თავად დაამზადონ თიხის ჭურჭელი.

პროექტის ფარგლებში გათვალისწინებულია წყალსადენის სისტემის, კანალიზაციის, სანიაღვრე სისტემის, ელექტრო გაყვანილობის, გათბობისა და გაგრილების,  ვენტილაციის და გაზმომარაგების სისტემების მოწყობა.

პროექტის მიზანია ქვევრის დამზადების ტრადიციული მეთოდების აღდგენა და სოფელ იყალთოს ისტორიულ-კულტურული, ტურისტულ-რეკრეაციული და საგანმანათლებლო ფუნქციების განვითარება.

პროექტი, რომლის ღირებულება 2 290366,37 ლარია, მსოფლიო ბანკის ფინანსური მხარდაჭერით ხორციელდება.

„ქვევრის სახლში“ ტურისტები გაეცნობიან ქართულ ძირძველ ტრადიციებს და  გამართული ინფრასტრუქტურით ისარგებლებენ. სკოლა-სახელოსნოში ახალ თაობას შესაძლებლობა ექნება, შეისწავლოს ქვევრის დამზადების წესი და შენარჩუნებულ იქნეს უძველესი ტრადიციები. პროექტის მნიშვნელოვანია იმის გამოც, რომ ქვევრის ღვინის დაყენების უძველეს მეთოდს იუნესკოს მიერ არამატერიალური კულტურული მემკვიდრეობის ძეგლის სტატუსი აქვს მინიჭებული. მშენებლობის დასრულების შემდეგ ქვევრის სახლში ადგილობრივი მოსახლეობა დასაქმდება.