პროკურატურის მიერ ბადრი პატარკაციშვილის საქმის გახსნას უნიჭოდ დადგმული პიარსვლაა - სალომე სამადაშვილი

არ გამიკვირდება ხვალ მოვისმინო, რომ ილია ჭავჭავაძის მკვლელობა სხვისი ბრალია, - ამის შესახებ "ნაციონალური მოძრაობის" წევრმა სალომე სამადაშვილმა მთავარი პროკურატურის მიერ გავრცელებულ ჩანაწერთან დაკავშირებით განაცხადა.

მისი თქმით, პროკურატურის მიერ ბადრი პატარკაციშვილის საქმის გახსნას უნიჭოდ დადგმული პიარსვლაა.

"დღეს 2018 წლის 17 ოქტომბერია, „ქართული ოცნება“ ქვეყანას ექვსი წელია მართავს, ლარის კურსი 2,68 ნიშნულზეა და ხელისუფლებას ისეთი საპრეზიდენტო კანდიდატი ჰყავს, რომელსაც მხარს არავინ არ უჭერს და მმართველი გუნდი არჩევნებს აგებს. ამ რეალობის ფონზე მთავარი პროკურატურის განცხადება ძალიან უნიჭოდ დადგმული პიარსვლაა, რომლითაც „ქართულმა ოცნებამ“ ქართველი ხალხის მოტყუება 2012 წელს შეძლო. „ქართული ოცნება“ იგივე მეთოდებით მუშაობს და არ გამიკვირდება ხვალ მოვისმინო, რომ ილია ჭავჭავაძის მკვლელობა სხვისი ბრალია, ან სხვა აბსურდული განცხადება გაავრცელონ. ეს ყველაფერი უნიჭო, აბსურდული, ფუჭი მცდელობაა და ქართველი ხალხი „ქართულ ოცნებას“ პასუხს 28 ოქტომბერს გასცემს. ხელისუფლება ქართველი ხალხის მოტყუებას უსინდისოდ ცდილობს, რადგან ქართველი ხალხისთვის სხვა შეთავაზება არ აქვს”, – განაცხადა სამადაშვილმა.

ცნობისთვის, პროკურატურის ინფორმაციით, ბადრი პატარკაციშვილის მკვლელობის მომზადების ფაქტი გახსნილია.