საქართველოს საპარლამენტო დელეგაციამ გაეროს კლიმატის ცვლილების სამიტის ფარგლებში გამართულ შეხვედრაში მიიღო მონაწილეობა

საქართველოს საპარლამენტო დელეგაციამ, საქართველოს პარლამენტის თავმჯდომარის პირველი მოადგილის, მანანა კობახიძის ხელმძღვანელობით, პარიზში, გაეროს კლიმატის ცვლილების სამიტის(COP21/CMP11) ფარგლებში გამართულ შეხვედრაში მიიღო მონაწილეობა.

2-დღიანი ღონისძიება საფრანგეთის პარლამენტისა და საპარლამენტთაშორისო კავშირის (IPU) ორგანიზებით გაიმართა და ეს იყო ყველაზე მასშტაბური საპარლამენტო შეკრება კლიმატის ცვლილების სამიტის ფარგლებში, რომელსაც 90-მდე ქვეყნის საპარლამენტო დელეგაცია დაესწრო.

პარლამენტების როლი და საკანონმდებლო იმპლემენტაციის მექანიზმები - ეს იყო მთავარი თემა, რომელზეც დეპუტატებმა იმსჯელეს და სხვადასხვა ქვეყნების გამოცდილებები გაიზიარეს. ასევე საუბარი იყო იმ უარყოფით შედეგებზე, რომელიც უმოქმედობის შემთხვევაში, უდიდეს საფრთხეს შეუქმნის კაცობრიობას და ზოგადად პლანეტას.

შეხვედრის ბოლოს მიღებულ იქნა დოკუმენტი, რომელიც ქვეყნებს ამ მიმართულებით კონკრეტული პოლიტიკის შემუშავებისა და ქმედებისაკენ მოუწოდებს.

"ბრძოლა კლიმატის ცვლილების წინააღმდეგ, არ შეიძლება გახდეს შემაფერხებელი ფაქტორი განვითარებისა, ამიტომ ეს გამოწვევა საერთო ჭრილში უნდა განვიხილოთ", - ნათქვამია დოკუმენტში.

შეხვედრა საფრანგეთის პარლამენტის ეროვნული ასამბლეის სპიკერის, კლოდ ბარტოლონეს მისასალმებელი სიტყვით გაიხსნა.
გახსნით სესიაზე მონაწილეებს სიტვით მიმართეს: სენატის სპიკერმა ჟერარ ლარშემ, გაეროს გენერალურმა მდივანმა პან გი მუნმა, საფრანგეთის საგარეო საქმეთა მინისტრმა ლორენ ფაბიუსმა, საპარლამენტთაშორისო კავშირის პრეზიდენტმა საბერ ჩოუდორიმ და საფრანგეთის ეკოლოგიის, მდგრადი განვითარებისა და ენერგეტიკის მინისტრმა სეგოლენ როიალიმ. შეხვედრას ესწრებოდნენ გაეროს და სხვადასხვა საერთაშორისო ორგანიზაციების ექსპერტებიც.