კახა კახიშვილმა თურქეთის იუსტიციის მინისტრთან შეხვედრაზე ქართველ მსჯავრდებულთა პირობების გაუმჯობესების საკითხი დააყენა

სასჯელაღსრულებისა და პრობაციის მინისტრი კახა კახიშვილი სამინისტროს დელეგაციასთან ერთად, თურქეთში ვიზიტის ფარგლებში, თურქეთის იუსტიციის მინისტრს ბექირ ბოზდაღს შეხვდა. შეხვედრაზე განსახილველი მთავარი თემა თურქეთის პენიტენციურ დაწესებულებებში საქართველოს მოქალაქე მსჯავრდებულთა სასჯელის მოხდის პირობები იყო.

კახა კახიშვილმა იუსტიციის მინისტრთან საქართველოს მოქალაქე პატიმართა უფლებრივი მდგომარეობისა და მათი პირობების გაუმჯობესების საკითხები დააყენა. კერძოდ, მან იუსტიციის მინისტრს საქართველოს მოქალაქე მსჯავრდებულთა ერთ დაწესებულებაში განთავსება, მათი ქართულენოვანი არხებით უზრუნველყოფა, ქართული მხარის მიერ თურქეთის პენიტენციური დაწესებულებების ბიბლიოთეკებისთვის ქართულენოვანი ლიტერატურის მიწოდების საშუალება, ასევე, ქართველ მსჯავრდებულთათვის სამლოცველო ოთახის გამოყოფა და დღესასწაულებზე შესაბამისი კვების რაციონით უზრუნველყოფა სთხოვა. თურქეთის 36 პენიტენციურ დაწესებულებაში საქართველოს 274 მოქალაქე იმყოფება. ქართული არხები ხელმისაწვდომია მხოლოდ სტამბოლის დაწესებულებებში, სადაც საქართველოს 121 მოქალაქე იხდის სასჯელს.

მინისტრმა თურქეთის საპატიმრო დაწესებულებებიდან გათავისუფლებული საქართველოს მოქალაქე პრობაციონერების საკითხიც განიხილა, რომლებიც არც დეპორტაციას ექვემდებარებიან და გარკვეული პერიოდი აკრძალული აქვთ თურქეთის ტერიტორიის დატოვება, რის გამოც ფინანსური და ყოფითი პრობლემები ექმნებათ. ისინი ვალდებულნი არიან აიღონ ბინადრობის ნებართვები, რაც სირთულეებთან არის დაკავშირებული. კახა კახიშვილი მიიჩნევს, რომ ეს საკითხი საკანონმდებლო დონეზე უნდა დარეგულირდეს. ამასთან, მისი თქმით, სასურველია გადაიხედოს თურქეთში საქართველოს მოქალაქეების მიერ პირველი ინსტანციის გადაწყვეტილების გასაჩივრების ვადების საკითხი.

თურქეთის იუსტიციის მინისტრმა საქართველოს სასჯელაღსრულებისა და პრობაციის მინისტრის თხოვნა გაიზიარა. მისი თქმით, საქართველოს მოქალაქე მსჯავრდებულთა თანხმობის შემთხვევაში, მათ ერთ დაწესებულებაში განათავსებენ, ასევე, უზრუნველყოფენ ქართულენოვანი არხებით. რაც შეეხება პრობაციონერთა და გასაჩივრების საკითხებს, ბექირ ბოზდაღის თქმით, ამ მიმართულებით საკანონმდებლო რეგულირების პროცესი და რეფორმა უკვე დაწყებულია.

კახა კახიშვილის განცხადებით, საკითხები, რომელიც თურქეთის იუსტიციის მინისტრთან შეხვედრაზე იქნა დაყენებული, ქართულ საპატიმრო დაწესებულებებში საქართველოში თურქეთის ელჩის თხოვნის თანახმად მოგვარებულია. კერძოდ, საქართველოს პენიტენციურ დაწესებულებებში თურქეთის 93 მოქალაქე იხდის სასჯელს. ისინი უზრუნველყოფილი არიან თურქულენოვანი არხებით; გამოყოფილია სპეციალური სამლოცველო ოთახები, სადაც ლოცვის და რიტუალების ჩატარების საშუალება აქვთ; ასევე, სურვილის შემთხვევაში, შესაძლებლობა აქვთ შეხვდნენ სასულიერო პირს; მათთვის ხელმისაწვდომია კვების სპეციალური რაციონი მარხვისა და დღესასწაულების პერიოდში; თურქ პატიმრებს აქვთ ერთმანეთთან კომუნიკაციის საშუალება, საქართველოს პენიტენციურ სისტემებში არსებულ ბიბლიოთეკებში ხელმისაწვდომია თურქულენოვანი ლიტერატურა და სხვა.

კახა კახიშვილმა თურქულ მხარეს პენიტენციურ სისტემაში რეფორმების განხორციელების პროცესში საქართველოს გამოცდილების გაზიარება შესთავაზა და მხარდაჭერა აღუთქვა. მან ბექირ ბოზდაღს იუსტიციის მინისტრად დანიშვნაც მიულოცა და საქართველოში მოიწვია. ამასთან, მინისტრმა საქართველოში ჩამოსვლა შესთავაზა ყველა იმ თანამდებობის პირს, რომელთაც ექსპერტულ დონეზე სურთ ინფორმაციის მიღება საქართველოს პენიტენციურ სისტემაში განხორციელებული რეფორმის შესახებ.

შეხვედრებს თურქეთში საქართველოს საგანგებო და სრულუფლებიანი ელჩი ირაკლი კოპლატაძეც ესწრებოდა. თურქეთის იუსტიციის მინისტმა მას თანამშრომლობისთვის მადლობა გადაუხადა. შეხვედრაზე დასმული საკითხების მოგვარების ტექნიკურ დეტალებზე კი, ქართული დელეგაციისა და თურქეთის სასჯელაღსრულებისა და საპატიმროების გენერალურ დირექტორთან ენის იავუზ ილდირიმთან გამართულ შეხვედრაზე იმსჯელეს.

თურქეთში ოფიციალური ვიზიტის ფარგლებში, საქართველოს სასჯელაღსრულებისა და პრობაციის მინისტრი კახა კახიშვილი, დელეგაციასთან ერთად, დღეს სტამბოლში N3 L ტიპის დახურულ სასჯელაღსრულების დაწესებულებას ეწვევა და იქ მყოფ ქართველ მსჯავრდებულებს შეხვდება. მინისტრი ქართველი პატიმრებს გაესაუბრება და მათი სასჯელის მოხდის პირობებს ადგილზე გაეცნობა. კახა კახიშვილმა ოფიციალური ვიზიტი თურქეთში ათათურქის მავზოლეუმის მონახულებითა და მისი საფლავის გვირგვინის შემკობით დაიწყო.