უკრაინაში განვითარებული მოვლენები სუვერენიტეტის დარღვევის უხეში ფაქტია, რომელსაც სჭირდება სერიოზული რეაგირება, მათ შორის საქართველოს ხელისუფლების –გიგი წერეთელი

უკრაინაში განვითარებული მოვლენები სუვერენიტეტის დარღვევის უხეში ფაქტია, ამას სჭირდება სერიოზული რეაგირება, მათ შორის საქართველოს ხელისუფლების, – ამის შესახებ „ევროპული საქართველოს“ წევრმა, დეპუტატმა გიგი წერეთელმა განაცხადა.

ამასთან, დეპუტატის თქმით, ამ საკითხს ეუთო-შიც განიხილავენ.

„ძალიან საგანგაშო ფაქტია. დღეს მქონდა საუბარი უკრაინის რამდენიმე ლიდერთან. გამოცხადებულია საომარი მდგომარეობა გარკვეული დროით, მაგრამ არა სრულმასშტაბიანი.

ვფიქრობ, ამას სჭირდება სერიოზული რეაგირება, მათ შორის საქართველოს ხელისუფლების, საქართველოს პარლამენტის. ჩვენ ეუთო-ში გვექნება ამ საკითხის სერიოზული განხილვა. ამის მიტოვება, გულგრილობა ნამდვილად არ შეიძლება. ეს არის ძალიან სერიოზული, უხეში ფაქტი სუვერენიტეტის დარღვევის და კიდევ ერთი ფაქტი მინსკის შეთანხმების შეუსრულებლობის“,- განაცხადა გიგი წერეთელმა.

25 ნოემბერს, რუსეთის მხრიდან უკრაინული გემების მიმართ თავდასხმა განხორციელდა.რუსი სამხედროების თავდასხმის შედეგად დაიჭრა 6 უკრაინელი. ყირიმის ავტონომიურ რესპუბლიკაში უკრაინის პრეზიდენტის წარმომადგენელის, ბორის ბაბინის განაცხადებით, რუს მესაზღვრეებს 20-ზე მეტი უკრაინელი სამხედრო ჰყავთ დაკავებული.

გვიან ღამით, უკრაინაში ქვეყნის თავდაცვისა და უსაფრთხოების ეროვნული საბჭოს საგანგებო სხდომა გაიმართა, სადაც პრეზიდენტმა პოროშენკომ მხარი დაუჭირა სამხედრო კაბინეტის წინადადებას, უკრაინაში საომარი მდგომარეობის გამოცხადების შესახებ.