მიხეილ სააკაშვილმა უკრაინაში დაბრუნება გადაიფიქრა

საქართველოს ყოფილმა პრეზიდენტმა მიხეილ სააკაშვილმა უკრაინაში დაბრუნება გადაიფიქრა. ამის შესახებ მან ტელეარხ „ნაშის“ ეთერში განაცხადა.

 „ჩემი ბილეთი 1 აპრილისთვის ნაყიდი იყო იმ შემთხვევისთვის თუ პოროშენკო მეორე ტურში ვერ გავიდოდა. ჯერჯერობით მე მას ვერ ვხედავ“, - განაცხადა სააკაშვილმა.

მანამდე ის აცხადებდა, რომ ნაყიდი ჰქონდა ელექტრონული ბილეთი და უკრაინაში არჩევნების დასრულებისთანვე ჩასვლას აპირებდა.

არჩევნებამდე ერთი დღით ადრე პრეზიდენტობის კანდიდატმა ვლადიმირ ზელენსკიმ განაცხადა, რომ „მიხეილ სააკაშვილი სერიოზული დიპლომატი და კონსულტანტია ყველა დღევანდელი პოლიტიკოსისთვის“.  „დაე,სააკაშვილი ჩამოვიდეს“, - აღნიშნა მსახიობმა ზელენსკიმ. მისივე თქმით, სააკაშვილი ევროპაში უკრაინის დემოკრატიას იცავს.

უკრაინის პრეზიდენტის არჩევნების პირველ ტურში ვერცერთმა კანდიდატმა 50%-იანი ბარიერი ვერ გადალახა. ვლადიმირ ზელენსკი ხმათა 30,36 პროცენტს აგროვებს, ქვეყნის მოქმედი პრეზიდენტი პეტრო პოროშენკო კი ხმათა 16,40%-ს. არჩევნების მეორე ტური 21 აპრილს გაიმართება.