ეს ის პროცესია, რომელიც პარლამენტში იყო და რაც რამდენიმე ადამიანის წასვლით შემოიფარგლა - მდინარაძე ჯიშკარიანისა და შაქარიშვილის გადაწყვეტილებაზე

ძალიან გინდათ, რომ „ქართული ოცნების“ რღვევის პროცესი იყოს, მაგრამ ეს ის პროცესია, რომელიც პარლამენტში იყო და რაც რამდენიმე ადამიანის წასვლით შემოიფარგლა, - ამის შესახებ აპარლამენტო ფრაქცია „ქართული ოცნების“ თავმჯდომარე მამუკა მდინარაძემ ვახტანგ შაქარიშვილისა და ჯაბა ჯიშკარიანის გადაწყვეტილებაზე კომენტირებისას განაცხადა.

„ძალიან გინდათ, რომ „ქართული ოცნების“ რღვევის პროცესი იყოს, მაგრამ ეს ის პროცესია, რომელიც პარლამენტში იყო და რაც რამდენიმე ადამიანის წასვლით შემოიფარგლა. რამდენიმე თვით ადრე სოციალურ ქსელში ვატო შაქარიშვილის არაერთი სტატუსი ვნახეთ, რაც იმას მოგვასწავებდა, რომ ეს ადამიანი ვერ და არ იქნებოდა „ქართულ ოცნებაში“. აქედან გამომდინარე, ახალი არაფერია და არც თქვენს მიერ დაანონსებული ამბავი არის პერსპექტიული, რომ ეს არის „ქართული ოცნების“ რღვევის პროცესი“, – განაცხადა მამუკა მდინარაძემ.

მისი თქმით, ქვეყანაში ძალიან ბევრი გამოწვევაა, მათ შორის არის მწვავე გამოწვევებიც.

„ამ პრობლემებისა და გამოწვევების ადეკვატურად ნაბიჯებია გადასადგმელი. ამ ნაბიჯებზე ვზრუნავთ და ვფიქრობთ. „ქართული ოცნება“ ბევრ რამეს აკეთებს, რომ გამოწვევების ადეკვატური იყოს, პრობლემის აღმოფხვრასა და ხალხის გაჭირვებაზე იყოს ორიენტირებული, მაგრამ ამის გადაჭრის გზები არ არის პოპულისტური გამონათქვამები, პოპულისტური ნაბიჯები. ამის გადაჭრის გზები რეალური საქმეა. გუშინ სრული ისტერია მოვისმინეთ ოპოზიციური ფლანგის შესრულებით, რომელიც ადეკვატური იმ საუბრებთან არ იყო, რაც ჩვენი ლიდერის ინტერვიუში იყო“, – აღნიშნა მამუკა მდინარაძემ.

ვახტანგ შაქარიშვილმა და ჯაბა ჯიშკარიანმა „ქართული ოცნება“ და თბილისის საკრებულოს უმრავლესობა დატოვეს.