ვიდეოჯარიმების დროს ქულების კლების სისტემა არ იმოქმედებს

ვიდეოჯარიმების დროს ქულების კლების სისტემა არ იმოქმედებს, - განაცხადა შინაგან საქმეთა მინისტრის მოადგილემ შალვა ხუციშვილმა, რომელმაც პარლამენტის დარგობრივი ეკონომიკისა და ეკონომიკური პოლიტიკის კომიტეტს "საგზაო მოძრაობის შესახებ" კანონსა და "ადმინისტრაციულ სამართალდარღვევათა კოდექსში" შესატანი ცვლილებები გააცნო.

მისი თქმით, ქულების კლების სისტემა იმოქმედებს მხოლოდ საპატრულო პოლიციის მიერ მოქალაქის დაჯარიმების დროს.

”ქულები იმოქმედებს მხოლოდ საპატრულო პოლიციის მიერ მოქალაქის დაჯარიმების დროს. მნიშვნელოვანია, რომ ეს არ იქნება საპატრულო პოლიციის გადაწყვეტილებაზე. საპატრულო პოლიციელმა შეიძლება არ იცოდეს რამდენი ქულა აქვს მძღოლს დარჩენილი. იმისათვის, რომ თავიდან ავირიდოთ საპატრულო პოლიციელისთვის დამატებითი უფლებამოსილების მიცემა, მას შემდეგ, რაც პოლიციელი დააჯარიმებს და მოქალაქე არ გაასაჩივრებს, ჯარიმა მას შემდეგ რაც კანონიერ ძალაში შევა, ქვითარი ეგზავნება მომსახურების სააგენტოს, სადაც სპეციალური პროგრამული უზრუნველყოფის გზით ხდება ამ ქულების ჩამოკლება”, - განაცხადა ხიციშვილმა და აღნიშნა, რომ სახელმწიფო საკუთარ თავზე ვალდებულებას იღებს, რომ ქულების შემცირებისას მძღოლს სმს შეტყობინებით შეატყობინოს რა სამართლებრივი შედეგი მოჰყვა მის დარღვევას.