26 წლის გოგოს გაუპატიურებისა და თვითმკვლელობამდე მიყვანის ბრალდებით დაკავებულს სასამართლომ პატიმრობა შეუფარდა

საქართველო, თბილისი - 15:06 | 08.05.2021

ნანახია: 926

ყაზახეთის მოქალაქის გაუპატიურებისა და თვითმკვლელობამდე მიყვანის ბრალდებით დაკავებულ ბესიკ თოდუას, ცოტა ხნის წინ, აღკვეთის ღონისძიების სახით პატიმრობა შეეფარდა.

საქმეზე სასამართლოს შემდეგი სხდომა 23 ივნისს არის ჩანიშნული.

სამართალდამცველებმა ბრალდებული - ბ.თ. 6 მაისს დააკავეს. მას ბრალდება საქართველოს სისხლის სამართლის კოდექსის 137-ე მუხლის მე-2 ნაწილის "ბ" ქვეპუნქტით და 115-ე მუხლის პირველი ნაწილით (გაუპატიურება, რამაც მძიმე შედეგი გამოიწვია და თვითმკვლელობამდე მიყვანა, მსხვერპლისადმი მუქარით მისი პატივის და ღირსების სისტემატური დამცირებით) წარედგინა, რაც 8-დან 10 წლამდე თავისუფლების აღკვეთას ითვალისწინებს.

"დადგინდა, რომ 2021 წლის 5 მაისს, თბილისში, ბ.თ. -მ ფსიქოლოგიური ზემოქმედებით და სიცოცხლის მოსპობის მუქარით ა.ა. გააუპატიურა. ბ.თ.-ს ქმედების შედეგადაც მძიმე ფსიქოტრავმულ მდგომარეობაში მყოფი ა.ა. მერვე სართულიდან გადახტა და სიცოცხლე თვითმკვლელობით დაასრულა" - აცხადებს პროკურატურა.

ყაზახეთის მედიის ცნობით, 26 წლის ქალი საქართველოში, სამუშაოდ, აპრილში ჩამოვიდა.