ბათუმში, ქალისა და მამაკაცის ცხედრები იპოვეს

ბათუმში, კობალაძის ქუჩაზე ამ წუთებში ექსპერტ-კრიმინალისტები მუშაობენ. აჭარის საზოგადოებრივი მაუწყებლის ინფორმაციით, საცხოვრებელი სახლის ეზოში გარდაცვლილი მამაკაცის ცხედარი იპოვეს. მეზობლების თქმით, სავარაუდოდ ის უცხო ქვეყნის მოქალაქეა და მაღალი სართულიდან გადმოხტა ან გადმოვარდა.

შემთხვევა დილით 6 საათზე მოხდა.

ადგილობრივები ასევე ამბობენ, რომ მე-19 სართულზე, ერთ-ერთ საცხოვრებელ ბინაში გარდაცვლილია ქალიც. ის 26 წლის იყო და ბოლო რამდენიმე თვეა აღნიშნულ მისამართზე ცხოვრობდა.

მომხდარის შესახებ დეტალური ინფორმაცია უცნობია, თუმცა არსებობს ვარაუდი, რომ მამაკაცმა ქალი მოკლა, შემდეგ კი მე-19 სართულიდან გადახტა.

ადგილობრივები იმასაც ამბობენ, რომ გვიან ღამით, სადარბაზოში ბუნებრივი აირის მძაფრი სუნი იგრძნეს და არ არის გამორიცხული, რომ ახალგაზრდა ქალი, სავარაუდოდ, გაზის ინტოქსიკაციით დაიღუპა.