ბაიდენმა მკაცრად დაგმო ლუკაშენკას რეჟიმის მიერ თვითმფრინავის გატაცება

შეერთებული შტატების პრეზიდენტმა, ჯო ბაიდენმა Ryanair-ის თვითმფრინავის მინსკის აეროპორტში იძულებით დასმას "საერთაშორისო ნორმების პირდაპირი შეურაცხყოფა" უწოდა და თავის ადმინისტრაციას მომხდარზე რეაგირების ღონისძიებების შემუშავება დაავალა.

პრეზიდენტმა მკაცრად დაგმო მომხდარი ინციდენტი.

ჯო ბაიდენი უერთდება საერთაშორისო გამოძიების მოთხოვნის ინიციატივას, რომელიც გაისმა დასავლეთის ქვეყნების ლიდერებისგან. იგი ასევე მიესალმა ევროკავიშირის გეგმას ლუკაშენკას რეჟიმის წინააღმდეგ ეკონომიკური სანქციებისა და სხვა ზომების დაწესების შესახებ.

ამასთან, თეთრი სახლის მიერ გავრცელებული განცხადების თანახმად, ბაინდემა სთხოვა თავის ადმინისტრაციას, პარტნიორებსა და საერთაშორისო ორგანიზაციებთან კოორდინაციით, შეიმუშავონ მომხდარზე პასუხისმგებელი პირების მიმართ რეაგირების ღონისძიებები.

ამერიკის პრეზიდენტმა ლუკაშენკას რეჟიმის მიერ ჟურნალისტს პროტასევიჩის დაკავებას უწოდა "სამარცხვინო შეტევა როგორც პოლიტიკურად განსხვავებულ აზრზე, ასევე პრესის თავისუფლებაზე".

"შეერთებული შტატები უერთდება მსოფლიოს ქვეყნებს მისი გათავისუფლების, აგრეთვე ასობით პოლიტპატიმრის გათავისუფლების მოთხოვნას, რომლებიც უსამართლოდ არიან დაკავებულნი ლუკაშენკას რეჟიმის მიერ", - განაცხადა აშშ-ს პრეზიდენტმა.

ბაიდენის თქმით, შეერთებული შტატები გააგრძელებს ბელარუსი ხალხის მხარდაჭერას.

შეგახსენებთ, 23 მაისს, ლუკაშენკას განკარგულებით, ათენიდან ვილნიუსს მიმავალი Ryanair-ის თვითმფრინავი, ოპოზიციურად განწყობილი ჟურნალისტის, Nexta-ის ყოფილი რედაქტორის რომან პრატასევიჩის დაკავების მიზნით, მინსკის აეროპორტში იძულებით დასვეს.

ბელარუსის სახელისუფლებო მედიის ცნობით, თვითმფრინავი მინსკში ბორტზე არსებული ასაფეთქებელი მოწყობილობის შესახებ შესული ინფორმაციის საფუძველზე დასვეს. ჩხრეკის შედეგად, ბორტზე არავითარი ასაფეთქებელი ნივთიერება აღმოუჩენიათ.

24 მაისს ლუკაშენკას მიერ მართულმა მედიამ გაავრცელა ვიდეოჩანაწერი, სადაც დაკავებული ჟურნალისტი, რომან პროტასევიჩი ამბობს, რომ თანამშრომლობს გამოძიებასთან და მასობრივი არეულობების ორგანიზების შესახებ აღიარებით ჩვენებას აძლევს. ბელარუსის ოპოზიცია აცხადებს, რომ პროტასევიცი სავარაუდოდ ნაცემია და მისი ჩვენება ძლიერი წნეხის შედეგად არის მოპოვებული.

მინსკი რომან პროტასევიჩს ექსტრემისტულ საქმიანობაში სდებს ბრალს. 2019 წელს პროტასევიჩმა ბელარუსი დატოვა და პოლონეთს სთხოვა თავშესაფარი.