კობახიძის თქმით, წარსულში მისი მხრიდან გახარიას ქება გუნდურობის საუკეთესო გამოვლინება იყო

„ქართული ოცნების“ თავმჯდომარის , ირაკლი კობახიძის თქმით, ყოფილი პრემიერ მინისტრის, გიორგი გახარიას მიმართ მისი და პარტიის ლიდერების მიერ წარსულში გაკეთებული განცხადებები გუნდურობის მაგალითი იყო. მან ასე უპასუხა მთავარი არხის გადაცემა "გიორგი გაბუნიას ინტერვიუ ხელისუფლებასთან" წამყვანს შეკითხვაზე, თუ რატომ აქებდა წასრულში გახარიას, დღეს კი მას აკრიტიკებს.

„ის განცხადებები რომელიც ჩვენ ვნახეთ, ასევე გუნდის სხვა წევრების განცხადებებიც არის გუნდურობის საუკეთესო გამოვლინება. როდესაც ხარ კონკრეტული გუნდის წევრი, შენ გმართებს შენი გუნდის ინტერესების დაცვა და შენი თანაგუნდელების სათანადოდ წარმოჩენა, ეს არის გუნდურობის მაგალითი, ბუნებრივია,“ – ამბობს კობახიძე.

მისი თქმით, მაშინაც არსებობდა გარკვეული კრიტიკული კითხვის ნიშნები, მაგრამ გარდამტეხი 17-18 თებერვლის მოვლენები და გიორგი გახარიას გადადგომა აღმოჩნდა.

„ანუ რაც შეეხება ღალატს და ამ პრობლემას რომელიც ჩვენ ვიხილეთ, და ის განცხადებები რომელიც მოვისმინეთ 17 თებერვლამდე, როდესაც ჩვენ ვიყავით ერთიანი გუნდის წევრები.
გახსოვთ, რომ მას ჰქონდა მძიმე მდგომარეობა, განსაკუთრებით 20 ივნისის შემდეგ და გუნდმა ყველაფერი გააკეთა იმისთვის, რომ მისი იმიჯი რადიკალურად შემოტრიალებულიყო,“ – თქვა კობახიძემ.