დღეს თუ ვინმეა დაინტერესებული არჩევნების გადადებით, ეს ქართული ოცნებაა - გიორგი გახარია

სიმართლე თუ გინდათ - დღეს თუ ვინმეა დაინტერესებული არჩევნების გადადებაში - ეს ქართული ოცნებაა, სხვა არავინ, - ამის შესახებ განაცხადა პარტია საქართველოსთვის ლიდერმა გიორგი გახარიამ.

გახარია ამბობს, რომ მთავრობამ კეკლუცობას უნდა დაანებოს თავი, საქმეს მიხედოს, რათა შესაძლებელი გახდეს არჩევნების უსაფრთხო გარემოში ჩატარება.

"დღეს არჩევნების გადადებაზე საუბარი არის უპასუხისმგებლობა. იმიტომ რომ არსებობს შესაძლებლობა არჩევნები ჩატარდეს უსაფრთხო გარემოში და ამაზე უნდა საუბრობდეს დღეს მთავრობა.

ეს მაშინ უნდა გახსენებოდა მთავრობას და კიდევ ბევრ სხვას, როდესაც ქუჩაში პირბადის ტარება გააუქმეს და კიდევ ბევრი არათანმიმდევრული ნაბიჯი გადადგეს - მაშინ უნდა გაგვხსენებოდა ეს ყველაფერი და არა ახლა, როდესაც ერთ თვეში უკვე არჩევნებია. სიმართლე თუ გინდათ - დღეს თუ ვინმეა დაინტერესებული არჩევნების გადადებაში - ეს ქართული ოცნებაა, სხვა არავინ. მე ეს ყველაფერი მართულ პროცესად მეჩვენება.

ყველას კარგად უნდა გვესმოდეს ქვეყნისთვის დღეს რას ნიშნავს არჩევნები. არჩევნებამდე ჯერ საკმაო დროა იმისთვის, რომ პანდემია უმართავად კი არ მიმდინარეობდეს - მთავრობამ საბოლოო ჯამში, როდესღაც კეკლუცობას დაანებოს თავი და საქმეს მიხედოს და შესაბამისად შესაძლებელი გახდეს არჩევნების უსაფრთხო გარემოში ჩატარება", - თქვა გახარიამ.

სახალხო დამცველმა, ნინო ლომჯარიამ პოლიტიკურ პარტიებს და მმართველ გუნდს მოუწოდა, იმსჯელონ არჩევნების გადადების შესახებ, რადგან საქართველოში ეპიდვითარება მძიმეა.