პრეზიდენტმა იგრძნო საშიშროება, რომ „ქართულმა ოცნებამ“ ღიად გადაუხვია პროდასავლურ გზას - ნონა მამულაშვილი

პრეზიდენტმა იგრძნო ის საშიშროება, რომ ღიად გადაუხვია „ქართულმა ოცნებამ“ პროდასავლურ გზას და მას სხვა გამოსავალი არ დარჩა, გარდა იმისა, რომ გააკრიტიკოს უმრავლესობის ეს გადაწყვეტილება, - განაცხადა „ნაციონალური მოძრაობის“ წევრმა, ნონა მამულაშვილმა საქართველოს პრეზიდენტის სალომე ზურაბიშვილის გუშინდელი განცხადებების შეფასებისას.

„ვხედავთ, რომ ბოლო რამდენიმე თვის განმავლობაში, „ქართული ოცნება“ ღიად საუბარს არ ერიდება, რომ პროდასავლური გეგმები აღარ აქვს და ჩვენი მომავალი მათი ხელისუფლების პირობებში რუსეთი და რუსეთის გავლენების გაძლიერებაა, რაც მათ ბოლო რვა წლის განმავლობაში კარგად გამოსდით. სამწუხაროდ, პრეზიდენტი „ქართული ოცნების“ ზეწოლის მსხვერპლია და მისგან კრიტიკას ვერ მივიღებთ. ვიცით, როგორ გახდა პრეზიდენტი, მას არ შეუსრულებია მისი კონსტიტუციური მოვალეობა, რომ საქართველოს ევროპული მომავალი დაეცვა, დღეს კი, უბრალოდ იგრძნო ის საშიშროება, რომ ღიად გადაუხვია „ქართულმა ოცნებამ“ პროდასავლურ გზას და მას სხვა გამოსავალი არ რჩება, თუ არა, გააკრიტიკოს უმრავლესობის ეს გადაწყვეტილება. რა თქმა უნდა, მას მოუწია „ნაციონალურ მოძრაობაზე“ ნეგატიური კომენტარის გაკეთება, რადგან სხვანაირად არ გამოუვა, დავალება აქვს, რომ აუცილებლად ოპოზიციაზე კრიტიკული მოსაზრებები გააჟღეროს. „ნაციონალური მოძრაობა“ და ზოგადად, ოპოზიცია ის ძალაა, რომელიც პროდასავლურია. ჩვენ გუშინ ვაჩვენეთ, რომ გვტკივა და ძალიან განვიცდით საქართველოს დღევანდელ მდგომარეობას“, – განაცხადა ნონა მამულაშვილმა.