დღისით, მზისით მივედი კალაძესთან, მხოლოდ ერთი მიზნით, რომ გამეფრთხილებინა. ალბათ შევცდი - გახარია

მოძრაობა საქართველოსთვის ლიდერი, მერობის კანდიდატი, გიორგი გახარია, "ტვ პირველის" გადაცემა "პოლიტიკურ ამბებში", თბილისის მოქმედ მერთან, კახა კალაძესთან შეხვედრაზე პირველ ვრცელ კომენტარს აკეთებს.

გახარიას თქმით, კალაძესთან შეხვედრა და ინფორმაციის მიწოდება, რომ ის მერობისთვის იბრძოლებდა წარსული ურთიერთობის გამო გადაწყვიტა.

"მე დღისით, მზისით, დილით, დაახლოებით, 11 სთ-ზე მივედი ღიად მერიაში, 21-ე სართულზე კალაძესთან, მხოლოდ და მხოლოდ ერთი მიზნით - რომ გამეფრთხილებინა, რომ დღეს მე გავხდებოდი მისი კონკურენტი და დავაყენებდი ჩემს კანდიდატურას მერობისთვის არჩევნებში ბრძოლის პროცესზე. ეს იყო და ეს, ამის იქით არაფერი არ ყოფილა... ჩემთვის, უბრალოდ, ეს იყო პატივისცემა იმ წლები თანამშრომლობის, რომელიც ჩვენ გვაკავშირდებდა. ეს ჩემი პრინციპია, ეს ჩემი ფასეულობები იყო და მე ვთვლი, რომ სწორად მოვიქეცი". - თქვა გახარიამ.

გახარიას თქმით,  ეს ფასეულობების თემაა, რაც ბევრს არ ესმის და გული სწყდება, რომ კალაძემ ვერ გაიგო მისი ვიზიტის მიზეზი.

"ეს მხოლოდ ფასეულობების თემაა. ზოგიერთს ეს არ ესმის. მე არ მინახავს, უბრალოდ, შეიძლება, ვცდები, მაგრამ ძაან გული დამწყდა, თუ ეს სიმართლეა, თურმე კალაძეს უთქვამს, ვერ გავიგე რისთვსი მოვიდა, რა უნდოდაო. ეს ნათქვამი მაძლევს იმის თქმის შესაძლებლობას, რომ ალბათ მართლა შევცდი და ტყუილად მივედი", - თქვა გიორგი გახარიამ.