მიხეილ სააკაშვილის ციხეში ყოფნა „ქართულ ოცნებას“ ვნებს - დენიელ ფრიდი

მე არ მომწონს, რომ სააკაშვილი უცებ პარაშუტით ჩამოფრინდა და გადაწყვიტა, რომ ცხენზე ამხედრებული მოვლენოდა ქვეყანას, მაგრამ მეორე მხრივ, არის მისი ადგილი ნამდვილად ციხეში? - ამის შესახებ აშშ-ის სახელმწიფო მდივნის ყოფილმა მოადგილემ, დენიელ ფრიდმა "ამერიკის ხმასთან" ინტერვიუში განაცხადა.

მისი თქმით, სააკაშვილის ციხეში ყოფნა "ქართულ ოცნებას" ვნებს, რადგან ყოფილი პრეზიდენტის საპატიმროში ყოფნა არასოდეს არის კარგი.

"ეს ზოგადად არ არის ის, რასაც დემოკრატიები აკეთებენ. ეს არასდროსაა კარგი. მიხეილ სააკაშვილი დამყოფი ფიგურაა. ის გამოკვეთილ ყურადღებას იქცევს, დრამატულია. მაგრამ ჩემთვის ასევე მკაფიოდ ჩანს, რომ საქართველოს საზოგადოების მხრიდან აღარ აქვს ის პატივისცემა, რომელიც მისი მმართველობის საწყის წლებში ჰქონდა. შეიძლება, ის საქართველოში იმ ოცნებით დაბრუნდა, რომ ხელახალ ვარდების რევოლუციას მოაწყობდა. მე ამას უბრალოდ ვერ ვხედავ. რევოლუციების დრო აღარ არის. ააშენე პოლიტიკური პარტია, თავი მოაწონე ამომრჩეველს და გაიმარჯვე არჩევნებში", - თქვა ფრიდმა.

დენიელ ფრიდმა ადგილობრივი თვითთმართველობის არჩევნებზეც ისაუბრა და განაცხადა, რომ მიუხედავად მნიშნველოვანი ხარვეზებისა, ის კონკურენტულ გარემოშ ჩატარდა.

"ადგილობრივმა არჩევნებმა აჩვენა, რომ „ქართულ ოცნებას“ ჯერ ისევ დიდი მხარდაჭერა აქვს. არჩევნებმა ასევე აჩვენა, რომ ოპოზიცია ძლიერად არის წარმოდგენილი ბევრ ქალაქში, ბევრ ადგილობრივ მთავრობაში. მე ეუთო/ოდირის ანგარიში წავიკითხე. ეს არჩევნები დარღვევებით ჩატარდა და მთავრობისგან უკეთესის მოლოდინი მაქვს, მაგრამ ამ არჩევნებში პოლიტიკური ძალები ერთმანეთს შეეჭიდნენ. ეს არ იყო ისეთი არჩევნები, როგორიც რუსეთში ჩატარდა. ეს არჩევნები იყო ხარვეზიანი, მაგრამ კონკურენტული. ეს არის სწორედ ის, რაც პოლიტიკურმა ძალებმა უნდა გააკეთონ. მე არ მომწონს, რომ სააკაშვილი უცებ პარაშუტით ჩამოფრინდა და გადაწყვიტა, რომ ცხენზე ამხედრებული მოვლენოდა ქვეყანას, მაგრამ მეორე მხრივ, არის მისი ადგილი ნამდვილად ციხეში? მისი ციხეში ყოფნა „ქართულ ოცნებას“ ვნებს", - აღნიშნა ფრიდმა.

ყოფილი მაღალჩინოსანი ასევე შეეხო საქართველოში თავდაცვის მდივან ლოიდ ოსტინის ვიზიტს. ფრიდის თქმით, ოსტინის ვიზიტი მიანიშნებს იმაზე, რომ ამერიკა საქართველოზე ზრუნავს.

"ეს აჩვენებს იმას, რომ შეერთებული შტატები საქართველოზე ზრუნავს, შეერთებული შტატები საქართველოს უკან არ ტოვებს და მხარ უჭერს მის სუვერენიტეტს, მის ტერიტორიულ მთლიანობას და ევროატლანტიკურ მომავალს. საქართველოს ამერიკის მხარდაჭერა აქვს, მაგრამ ახლა კითხვა იმაში მდგომარეობს, თუ რას გააკეთებს საქართველო", - დასძინა ფრიდმა.