იუსტიციის სამინისტრო მიხეილ სააკაშვილს გორის ჰოსპიტალში გადაყვანას სთავაზობს

ხელისუფლება მიხეილ სააკაშვილს გიორგი აბრამიშვილის სახელობის გორის სამხედრო ჰოსპიტალში გადაყვანას სთავაზობს, - ამის შესახებ იუსტიციის მინისტრმა რატი ბრეგაძემ სამინისტროში გამართულ საგანგებო ბრიფინგზე განაცხადა.

რატი ბრეგაძის განცხადებით, გორის ჰოსპიტალი ის ადგილია, სადაც მისი უსაფრთხოება მაქსიმალურად იქნება დაცული.

"ადამიანის სიცოცხლისა და ჯანმრთელობის ინტერსებიდან გამომდინარე, ადამიანის უფლებათა სასამართლოს გადაწყვეტილების სისრულეში მოსაყვანად, რომელსაც ობსტურქციული პოლიტიკური ძალების წაქეცებით არ ასრულებს პატიმარი სააკაშვილი, ვთავაზობთ შემდეგს, რომ მიხეილ სააკაშვილი გადაყვანილი იყოს გიორგი აბრამიშვილის სახელობის თავდაცვის სამინისტროს სამხედრო ჰოსპიტალში. ეს არის ადგილი, სადაც მისი ჯანმრთელობა და უსაფრთხოება სახელწიფოს მხრიდან იქნება დაცული. ამ გადაწყვეტილებით ჩვენ ვიცავთ არა მხოლოდ მიხეილ სააკაშვილის, არამედ სხვა ადამიანების ჯანმრთელობას და სიცოცხლეს, რომლებიც ახლა შიმშილობენ", - განაცხადა რატი ბრეგაძემ.

მისივე თქმით, მკურნალობის კურსის დასრულების შემდეგ, სააკაშვილი გადაყვანილი იქნება რუსთავის მე-12 დაწესებულებაში.

ამასთან, რატი ბრეგაძის თქმით, ნებისმიერი მცდელობა, რამაც შეიძლება ხელი შეუშალოს მიხეილ სააკაშვილის გადაყვანის პროცესს, უმკაცრესად იქნება აღკვეთილი.

"აქვე ხაზგასმით უნდა ვთქვათ, რომ ოპონენტების მხრიდან ნებისმიერი სახის პროვოკაციის შემთხვევაში, რამაც შეიძლება ხელი შეუშალოს პატიმრის გადაყვანას და შემდგომ სამედიცინო პერსონალის მუშაობას, პატიმარი გადაყვანილი იქნება მე-18 დაწესებულებაში და ნებისმიერი კანონდამრღვევი უმკაცრესად აგებს პასუხს კანონის წინაშე. მოვუწოდებთ ყველას, მეტი მოქალაქეობრივი პასუხისმგებლობისკენ. სიძულვილის ენის, აქამდე გაუგონარი მასშტაბით გამოყენებისა და კანონმორჩილ თანამშრომლებს, მათი ოჯახის წევრებზე დაუყოვნებლი თავდასხმის შეწყვეტისაკენ", - განაცხადა მინისტრმა.