ვერასდროს გახდები შენ ზვიად გამსახურდია - ირაკლი ზარქუა სააკაშვილს

საპარლამენტო უმრავლესობის წევრი, ირაკლი ზარქუა მიხეილ სააკაშვილის მიერ სასამართლო პროცესზე გაკეთებულ განცხადებებს ეხმიანება.

ზარქუას თქმით, მიხეილ სააკაშვილი ეცადა თავის გამოსვლაში, პარალელები გაევლო ზვიად გამსახურდიასთან, რაც არ გამოუვიდა.

"კიდევ ერთხელ დარწმუნდით, რომ მას არაფერი აქვს ქართული. ეს ჩვეულებრივი უკრაინის მოქალაქეა, რომელიც პატივს არ სცემს არც საქართველოს ინტერესებს, არც საქართველოს საზღვრებს, არც საქართველოს პასპორტს. მიხეილ სააკაშვილმა საზოგადოებას მიმართა, არ მოგენატრათ სიყვარული და განვითარებაო?! იქნებ, მას სიყვარული და განვითარება თავისებურად ესმის, ქუჩებში ადამიანების ჩახოცვა, ბიზნესის რეკეტი, ახალგაზრდების მოკვდინება. არა, ბატონო მიშა, ეს არ მოენატრა საქართველოს და ამაზე მეტყველებს ის, რომ მეცხრე არჩევნები პირწმინდად წააგე.

ეს იყო მცდელობა კიდევ იმის, რომ რაღაც გული აუჩუყოს. ზვიად გამსახურდია არის ნამდვილი გმირი, მერაბ კოსტავასთან ერთად და ჩვენ უამრავი გმირები გვყავს ეროვნული მოძრაობის და ეს იყო მცდელობა, უბადრუკი მცდელობა, რომ რაღაც პარალელები გაავლოს ზვიად გამსახურდიასთან. ვერასდროს ვერ გახდები შენ ზვიად გამსახურდია, ვერასდროს ვერ გახდები შენ მერაბ კოსტავა. რა კაცობაა, საქართველოში არაჟნებში ჩამალული შემოვიდა და პრეტენზია აქვს ეროვნულ მოძრაობაზე. ამ ფონზე ზვიად გამსახურდიას ეტოლება", - განაცხადა ზარქუამ.