ჩვენი მთავრობის მთავარი მიზანია მშვიდობის შენარჩუნება, სტაბილურობის უზრუნველყოფა და ეკონომიკური განვითარების ხელშეწყობა - ირაკლი ღარიბაშვილი

ჩვენი მთავრობის მთავარი მიზანი არის მშვიდობის შენარჩუნება, სტაბილურობის უზრუნველყოფა და ეკონომიკური განვითარების ხელშეწყობა, – ამის შესახებ საქართველოს პრემიერ-მინისტრმა, ირაკლი ღარიბაშვილმა ბაქოში, SPECA-ს ეკონომიკურ ფორუმზე განაცხადა.

„ბოლო წლებში ჩვენი ქვეყნის ეკონომიკა გაიზარდა 10 პროცენტით. 2021-2022 წლებში 10 პროცენტზე მეტი გვქონდა ეკონომიკური ზრდა. ეს ტრენდი შენარჩუნებული არის წელსაც. 7-პროცენტიანი ზრდა გვაქვს მიმდინარე პერიოდში. ინფლაცია არის ძალიან დაბალი, 1 პროცენტზე ნაკლები. მოსალოდნელია, რომ წლის ბოლოს ერთ სულ მოსახლეზე მშპ-ის მაჩვენებელი იქნება 8 000 დოლარზე მეტი, რაც არის ბოლო სამ წელიწადში გაორმაგება ამ პარამეტრის. მინდა, ვთქვა, რომ 2024 წელს ერთ სულ მოსახლეზე გადაანგარიშებით მშპ იქნება 8 500 დოლარზე მეტი. გარდა ამისა, მინდა, გაგიზიაროთ მონაცემები, რომ ჩვენი ქვეყნის საერთაშორისო რეზერვები მიმდინარე წლის ივლისში ისტორიულ მაქსიმუმს გაუტოლდა. უმუშევრობა და სიღარიბე ისტორიულად დაბალ ნიშნულზე დავიდა“, – განაცხადა ირაკლი ღარიბაშვილმა.