“ნაციონალური მოძრაობის“ თბილისის ორგანიზაციის 15 თავმჯდომარე ლევან ხაბეიშვილის გადადგომას ითხოვს

ენმ-ს თბილისის ორგანიზაციის თავმჯდომარეებმა ერთობლივი განცხადება გაავრცელეს, რომელშიც ლევან ხაბეიშვილის თავმჯდომარის პოსტიდან გადადგომას ითხოვენ. განცხადებაში წერია, რომ ლევან ხაბეიშვილის და მოქმედი მენეჯმენტის მიერ გადადგმულმა არასწორმა ნაბიჯებმა პარტიაში მძიმე პოლიტიკური კრიზისი გამოიწვია.

"მოახლოებული 2024 წლის გადამწყვეტი საპარლამენტო არჩევნების წინ, რუსულ რეჟიმთან წინააღმდეგ ბრძოლისთვის და ერთიანი ძალებით მოქმედებისათვის, როგორც დროებითი ღონისძიება, აუცილებლად მიგვაჩნია პარტიაში მოხდეს სრული გადატვირთვა და პარტია გადავიდეს საგანგებო რეჟიმზე. კერძოდ:

1. დაუყოვნებლივ გადადგეს პარტიის თავმჯდომარე ლევან ხაბეიშვილი, შეუწყდეს უფლებამოსილება არადემოკრატიული წესით შექმნილ პოლიტსაბჭოს და შეიქმნას გადაწყვეტილების მიმღები მმართველი ორგანო ე.წ. "თანხმობის საბჭო" (და არა საკონსულტაციო საბჭო), რომლის უფლებამოსილებებში გაერთიანდება პარტიაში მოქმედი პოლიტსაბჭოს, სამდივნოს და თავმჯდომარის უფლებამოსილებები.

2. "თანხმობის საბჭო" დაკომპლექტდეს პარიტეტული პრინციპით, რომელიც ყველა მნიშვნელოვან გადაწყვეტილებას მიიღებს მაღალი ლეგიტიმაციით.

3. უახლოეს პერიოდში მოწვეულ იქნას პარტიის ყრილობა, რომელზეც მოხდება "საბჭოს" დამტკიცება და შესაბამისი ცვლილებების შეტანა პარტიის წესდებაში, როგორც დროებითი ღონისძიება, 2024 წლის საპარლამენტო არჩევნების ჩათვლით." - წერია განცხადებაში.

განცხადებას ხელს აწერს თბილისის ერთიანი ნაციონალური მოძრაობის რაიონული ორგანიზაციის 15 თავმჯდომარე: ბესო გაზდელიანი, გელა (გრიგოლ) გვილავა, გიორგი მათიაშვილი, გიორგი ჯაბუა, გოჩა გუგუციძე, გოჩა კოკაია, დავით კახაძე, დავით ლაგვილავა, დავით ნებიერიძე, ზვიად კუპრავა, თემო ნემსიწვერიძე, თენგიზ გიორგაძე, ლერი დემეტრაშვილი, მამუკა გუგეშაშვილი და რომეო ფარულავა.