უკრაინის ხელისუფლება ყველაფერს აკეთებს ქართულ-უკრაინული ურთიერთობის გასაფუჭებლად, ამას ვერ მიაღწევენ, რადგან უკრაინელები ჩვენი მეგობარი ხალხია - დავით მათიკაშვილი

უკრაინის მიერ ზურაბ ადეიშვილთან დაკავშირებით მიღებული გადაწყვეტილება მორალური სტანდარტიდან ამოვარდნილია, წლების განმავლობაში ქართველმა ხალხმა პირადად ზურაბ ადეიშვილისგან განიცადა უამრავი ტანჯვა, მიიღო ზღვა ცინიზმი და ცინიკური დანაშაულები, – ამის შესახებ პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა განაცხადა.

მისი თქმით, „სააკაშვილის ხელისუფლების პირობებში, მისგან და სააკაშვილისგან იყო შექმნილი სადისტური წამების რეჟიმი და ადამიანის უფლებები საერთოდ არაფერს ნიშნავდა, რადგან ახალგაზრდებს ქუჩებში ხოცავდნენ, ციხეში პატიმრებს აწამებდნენ და აუპატიურებდნენ, ბიზნესს და მესაკუთრეებს ქონებას ართმევდნენ“.

„ამ ადამიანს ცინიკურად და ყოველგვარი პატივისცემის გამოხატვის გარეშე, ჯერ ბრიუსელის თუ ევროპის სხვა დედაქალაქების ადმინისტრაციულ შენობებში დაატარებდნენ და ახლა უკრაინის კონკრეტული თანამდებობის პირი გახდა. ცინიკურ-სასაცილო არ არის?- არ შეიძლება, ცხრაგვარი სტანდარტი არსებობდეს და 16 სიმართლე იყოს. არსებობს ერთი სიმართლე და ეს ყველამ იცის, ვინც ოდნავ მაინც დაინტერესებულია იმით, თუ რა ხდებოდა საქართველოში 2003-2012 წლებში, მაგრამ თვალებზე ხელებს იფარებენ – უკრაინის ხელისუფლებას ამ ყველაფრის დანახვა არ უნდა. რატომ? – იმიტომ, რომ ეს იმ პოლიტიკის გაგრძელებაა, რასაც ზელენსკი აწარმოებს. სააკაშვილი გუბერნატორად ჰყავდათ დანიშნული, დღეს კი, დამნაშავე, მწამებელი და სადისტურ დანაშაულებში მხილებული პირი ინტერპოლის შეფად არის დანიშნული. უკრაინის ხელისუფლება ყველაფერს აკეთებს ქართულ-უკრაინული ურთიერთობის გასაფუჭებლად. რა თქმა უნდა, ამას ვერ მიაღწევენ, რადგან უკრაინელები ჩვენი მეგობარი ხალხია. დააკვირდით, რა გადაწყვეტილებებს იღებს საქართველოს ხელისუფლება – უკრაინელ ლტოლვილებს დახმარებები და ბენეფიტები უგრძელდებათ მიუხედავად იმისა, რომ ზელენსკის მხრიდან და მისი ხელისუფლების მხრიდან იმ ურთიერთობებზე გაუგონარი თავდასხმა ხდება, რომელიც ორ ქვეყანას შორის არსებობს“, – განაცხადა მათიკაშვილმა.

საქართველოს ყოფილი გენერალური პროკურორი და ყოფილი იუსტიციის მინისტრი ზურაბ ადეიშვილი უკრაინაში საერთაშორისო საპოლიციო თანამშრომლობის დეპარტამენტის დირექტორად დაინიშნა. შესაბამისი ინფორმაცია ოფიციალურ ვებგვერდზე უკვე განთავსდა.