დიმიტრი ქუმსიშვილმა „ნიკორა ტრეიდის“ მიერ კორპორატიული ობლიგაციების გამოშვება დადებითად შეაფასა

ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი დაესწრო საინფორმაციო ბრიფინგს, რომელიც შპს „ნიკორა ტრეიდის“ მიერ 5 მილიონი აშშ დოლარის ღირებულების ობლიგაციების გამოშვებას შეეხო. ფასიანი ქაღალდების განთავსება განახორციელა სს „გალტ ენდ თაგარტმა“. ობლიგაციების ვადა 2 წელია, საპროცენტო სარგებელი წლიური 10.50%-დან 11%-მდე ნომინალური ღირებულებიდან. სარგებლის პროცენტის გადახდა განხორციელდება წელიწადში 2-ჯერ.

საინფორმაციო ბრიფინგი ჩაატარეს სს „ნიკორას“ გენერალურმა დირექტორმა ირაკლი ბოქოლიშვილმა და „გალტ ენდ თაგარტის“ სამეთვალყურეო საბჭოს თავმჯდომარემ არჩილ გაჩეჩილაძემ.

როგორც ბრიფინგზე აღინიშნა, განთავსების აგენტი „გალტ & თაგარტი“ უზრუნველყოფს, რომ „ნიკორა ტრეიდი“-ს ობლიგაციები უახლოეს მომავალში დაშვებულ იქნეს საქართველოს საფონდო ბირჟაზე.    

ვიცე-პრემიერ დიმიტრი ქუმსიშვილის განცხადებით, კაპიტალის ბაზრის განვითარება საქართველოს მთავრობის მნიშვნელოვანი რეფორმაა. მისი თქმით, კომპანიებს ამით ეძლებათ შესაძლებლობა, მოახდინონ დაფინანსების წყაროების დივერსიფიკაცია. დიმიტრი ქუმსიშვილმა დადებითად შეაფასა „ნიკორა ტრეიდის“ მიერ კორპორატიული ობლიგაციების გამოშვების ფაქტი და აღნიშნა, რომ ამით საქართველოს კიდევ ერთი გამჭვირვალე ფინანსების მქონე კომპანია შეემატა. ვიცე-პრემიერის განცხადებით, ეროვნულ ბანკთან და ფინანსთა სამინისტროსთან ერთად შემუშავებულია კაპიტალის ბაზრის რეფორმის სამოქმედო გეგმა, რომელიც მთავრობის სხდომაზე უახლოეს პერიოდში იქნება წარმოდგენილი.