მინდია ჯანელიძე: დევდორაკის ხეობიდან 180 ადამიანის ევაკუაცია დროულად და წარმატებით განხორციელდა

დევდორაკის ხეობიდან 180 ადამიანის ევაკუაცია დროულად და წარმატებით მოხდა, - ამის შესახებ სახელმწიფო უსაფრთხოებისა და კრიზისების მართვის საბჭოს ხელმძღვანელმა განაცხადა. მინდია ჯანელიძის თქმით, დროულად მოხდა გზის გადაკეტვა და მოქალაქეების უსაფრთხოების უზრუნველყოფა. ჯანელიძემ ოპერატიული და კარგი მუშაობისთვის მადლობა ყველა იმ უწყების თანამშრომლებს გადაუხადა, რომლებიც სტიქიის ზონაში მუშაობდნენ.

"მინდა ხაზგასმით აღვნიშნო, რომ გასულ წელს დანერგილმა წინასწარი შეტყობინების სისტემამ წარმატებით იმუშავა. შედეგად, დროულად მოხდა გზის გადაკეტვა, მოქალაქეების უსაფრთხოების უზრუნველყოფა გეგმის მიხედვით და მსხვერპლის თავიდან აცილება. რაც შეეხება ხეობაში ამჟამად არსებულ ვითარებას, შესაბამისი უწყებების წარმომადგენლებმა და დამოუკიდებელმა ექსპერტებმა დღეს დილით ვერტმფრენის საშუალებით დაათვალიერეს სტიქიის ზონა, დევდორაკის მყინვარი და მდინარე დევდორაკის კალაპოტი. შედეგად მოხდა სტიქიის გამომწვევი მიზეზების დადგენა და მოსალოდნელი საფრთხის შეფასება. არსებული ინფორმაციით, ხეობის ტრანზიტულ ზონაში დარჩენილია დაახლოებით 150 ათასი კუბური მეტრი ნაშალი ქანების მასა, რომლის დაძვრაც შესაძლებელია ინტენსიური ნალექის პირობებში, საათში 20 მილიმეტრი ან მეტი", - განაცხადა მინდია ჯანელიძემ. 

ამას გარდა, სახელმწიფო უსაფრთხოებისა და კრიზისების მართვის საბჭოს ხელმძღვანელის ინფორმაციით, დაწყებულია აღდგენითი სამუშაოების პროექტის შემუშავება. მინდია ჯანელიძის განცხადებით, მოსალოდნელი საფრთხის გათვალისწინებით, გზის აღდგენითი სამუშაოების წარმოება შესაძლებელი იქნება მხოლოდ დღისით, მუდმივი დაკვირვების რეჟიმში. ადგილზე კი მობილიზებულია საჭირო ტექნიკა. ჯანელიძის ინფორმაციით, გზის აღდგენითი სამუშაოების დასრულების სავარაუდო ვადა დაახლოებით სამი კვირაა.