ყველაზე ჭარბწონიანმა მოზარდმა სხეულის მასის მესამედი დაიკლო

ინდონეზიელი არია პერმანი, რომელიც მსოფლიოში ყველაზე ჭარბწონიან მოზარდად იყო მიჩნეული, სხეულის მასის ერთი მესამედი დაიკლო, დივანიდან ადგა და მეგობრებთან თამაში და სკოლაში სიარულიც დაიწყო.

როგორც The Mirror-ი იუწყება, 10 წლის ასაკში პერმანი 192 კგ-ს იწონიდა. ორ წელიწადში მან 76 კგ დაიკლო და თავისი ცხოვრების წესი მკვეთრად შეცვალა: თავისუფალ დროს მეგობრებთან ერთად ბადმინტონსა და ფეხბურთს თამაშობდა და მთელ დღეებს დივანზე წამოწოლილი აღარ ატარებდა. ბიჭმა სკოლაში დამოუკიდებელად სიარულიც შეძლო, ის ყოველდღე 2 კმ-ს დარბოდა.

მისი მშობლები ბიჭის მიღწევებით გახარებულები არიან. „მას ბოლოსდაბოლოს აღარ აწუხებს სუნთქვის უკმარისობა, ბედნიერია და ცხოვრების აქტიურ წესს იცავს“, - ამბობს პერმანის დედა. ის შვილს უკრძლავს ტბილეულს და საკვებად ბევრ ხილსა და ბოსტნეულს აძლევს.

პერმანს პრესამ ყურადღება 2016 წელს მიაქცია, როდესაც ის ყავისფერი ბრინჯის მკაცრ დიეტაზე დასვეს. მანამდე ბიჭი დღეში ხუთჯერ მიირთმევდა. მის მენიუში შედიოდა წვნიანის უზარმაზარი ულუფა, ხორცი და ბრინჯი. მას ტანსაცმლის ჩაცმაც არ შეეძლო სარონგის გარდა (ტრადიციული სამოსი). 2017 წლის ზაფხულში ბავშვს კუჭის დაპატარავების ოპერაციაც გაუკეთდა.