მოსკოვში გამართულ შეხვედრაზე, ლიბიაში დაპირისპირებული მხარეები ცეცხლის შეწყვეტის შესახებ ვერ შეთანხმდნენ

საქართველო, თბილისი - 11:27 | 14.01.2020

ნანახია: 1096

ლიბიის ეროვნული არმიის მეთაურმა ხალიფა ჰაფთარმა მოსკოვი ისე დატოვა, რომ ლიბიის ეროვნული თანხმობის მთავრობასთან ცეცხლის შეწყვეტის შესახებ შეთანხმებაზე ხელი არ მოაწერა.

მოსკოვში გუშინ ლიბიაში დაპირისპირებულ მხარეებს შორის მოლაპრაკება გაიმართა, რომელშიც მონაწილეობას იღებდნენ რუსეთისა და თურქეთის წარმომადგენლებიც.

2011 წელს ლიბიის ლიდერის მუამარ კადაფის მკვლელობის შემდეგ ლიბია ფაქტობრივად ორ ნაწილად გაიყო. ამჟამად ქვეყანაში ორხელისუფლებიანობაა გამეფებული. აღმოსავლეთ ნაწილს განაგებს ხალხის მიერ არჩეული პარლამენტი, დასავლეთ ნაწილს, დედაქალაქ ტრიპოლში, მართავს გაეროსა და ევროკავშირის მიერ მხარდაჭერილი ეროვნული თანხმობის მთავრობა. აღმოსავლეთ ნაწილის ხელისუფლება ტრიპოლისგან დამოუკიდებლად მოქმედებს და თანამშრომლობს ლიბიის ეროვნულ არმიასთან, რომელსაც ჰაფთარი ხელმძღვანელობს.