„რეფორმატიორების" თავმჯდომარე კიდევ ერთხელ ეხმიანება თბილისის სახელმწიფო უნივერსიტეტში მიმდინარე პროცესებს და განცხადებას ავრცელებს. ირაკლი ღლონტი რექტორს სუსტ მენეჯმენტში ადანაშაულებს. პარტიის თავმჯდომარე ლადო პაპავას და განათლების მინისტრს თანამდებობიდან გადადგომას ურჩევს, რადგან მიიჩნევს, რომ სტუდენტებისთვის არაავტორიტეტული პირები თანამდებობაზე არ უნდა რჩებოდნენ. 

„ვუყურებ ორ ურთიერთდაპირისპირებულ ბანაკად ჩამოყალიბებულ სტუდენტებს, ეს უკვე ტრაგედიაა. ვფიქრობ, ამაში დამნაშავეა ყველა ის პასუხისმგებელი ხელმძღვანელი თანამდებობის პირი, რომელიც ვალდებული იყო უნივერსიტეტის ეფექტური მენეჯმენტის წარმართვაზე. 

მე თვითონ ვსწავლობდი უნივერსიტეტში, რომლის ხელმძღვანელი თანამდებობის პირები, ყველაფერს აკეთებდნენ, რომ სტუდენტებისთვის შექმნილიყო ჯანსაღი გარემო სწავლა–განათლების მისაღებად და სტუდენტების პოლიტიკური ზეგავლენისგან დასაცვად, ეს იყო თბილისის ეკონომიკურ ურთიერთობათა სახელმწიფო უნივერსიტეტი (თეუსუ), რომლის რექტორის, ბატონი გურამ თავართქილაძის უშუალო დამსახურებით, უნივერსიტეტი და მისი არც ერთი სტუდენტი, არასდროს  მოვქცეულვართ არც ერთი სახელისუფლებო დაწესებულებისა, თუ პოლიტიკური ძალის გავლენის ქვეშ. 

მე თვითონ გახლდით ამავე უნივერსიტეტის სტუდენტური თვითმმართველობის თავმჯდომარე და არასდროს ჩავრთულვართ პოლიტიკურად მართულ პროცესებში, არასდროს დაგვჭირვებია საპროტესტო აქციების გამართვა. ეს არ იყო მარტივი, ამის გამო რექტორს მწვავე დაპირისპირებაც ჰქონდა ხელისუფლებასთან, თუმცა, ჩვენ სტუდენტები ვიყავით აბსოლუტურად დაცული. უნივერსიტეტი წინა ხელისუფლების დაპირისპირებას შეეწირა და ის რექტორის გარდაცვალების შემდეგ უკანონოდ თსუ–ს მიუერთეს, ასე დასაჯეს პოლიტიკისგან შორს მდგარი ცოდნის ტაძარი, თუმცა პოლიტიკური სიბინძურისგან ასე გადავრჩით ჩვენ. 

როცა მე მაქვს ღირსეული რექტორის მაგალითი, ვერ ვპატიობ თსუ–ს რექტორს სუსტ მენეჯმენტს და სრულ პასუხისმგებლობას ვაკისრებ მას დღევანდელ მწვავე პროცესთან მიმართებით, ლადო პაპავამ დღეს უნდა აიღოს პასუხისმგებლობა და გადადგეს დაკავებული თანამდებობიდან. თანამდებობიდან გადადგომას ვურჩევ ასევე მინისტრს, რომელსაც არ უსმენენ სტუდენტები, და მიმაჩნია, რომ სტუდენტებისთვის არაავტორიტეტულმა თანამდებობის პირებმა უნდა დატოვონ თანამდებობა. " – ნათქვამია ღლონტის განცხადებაში.