პრეზიდენტის სასახლემ თანამედროვე ხელოვნების გამოფენას უმასპინძლა

საქართველოს პრეზიდენტის სასახლემ თანამედროვე ხელოვნების გამოფენას „ფოლადის ძაფივით" უმასპინძლა, რომელზეც სამი თაობის ხელოვანთა ნამუშევრები იყო წარმოდგენილი.

გამოფენაზე წარმოდგენილია საფრანგეთში მოღვაწე ქართველი ემიგრანტის, კლასიკოსი ხელოვანის, ვერა ფაღავას 1930-1980-იანი წლების ნამუშევრები, თანამედროვე ქართველი ხელოვანების ქეთუთა ალექსი-მესხიშვილისა და თიკა ჟვანიას ტექსტილის ნამუშევრები და თბილისის აბრეშუმის მუზეუმის კოლექციის ნაწილი.

„გამოფენაზე სამი თაობის ხელოვანების ნამუშევრებია წარმოდგენილი. ვერა ფაღავა არაჩვეულებრივი ქართველი ფერმწერი იყო, რომელიც საფრანგეთში მოღვაწეობდა, იგი ჩვენთვის ნაკლებად ცნობილია, თუმცა ძალიან უყვართ ფრანგებს და აინტერესებთ მისი პერსონა. სასახლეში ასევე წარმოდგენილია საინტერესო ნამუშევრები, აბრეშუმის მაქმანები, რაც გვაფიქრებს თუ რამდენად მნიშვნელოვანი იყო საქართველოში აბრეშუმის წარმოება და დამუშავება. ასევე სასახლეში წარმოდგენილია თანამედროვე მხატვრების ნამუშევრები, რომლებმაც თავისი კონცეფცია ამ სივრცეს მოარგეს. აქ წარმოდგენილმა სამმა თაობამ მთლიანად წარმოაჩინა, როგორ შეიძლება ამ სივრცეში განლაგდეს სხვადასხვა ტიპის ნამუშევრები", - აღნიშნა პირველმა ლედიმ მაკა ჩიჩუამ.

გამოფენაში მონაწილეობას ასევე, ღია მიმართვით შერჩეული 20 სტუდენტი იღებს, რომლებიც საქართველოს სხვადასხვა უმაღლესი და სახელოვნებო სასწავლებლებიდან შეირჩნენ. გამოფენის სათაური „ფოლადის ძაფივით", სტუდენტების ჯგუფის მიერ გამოფენაზე წარმოდგენილი ვიდეო ნამუშევრის - „მეაბრეშუმეობის ლაბორატორია" მიხედვით შეირჩა.

გამოფენის მიზანია, აბრეშუმის მსგავსად საქართველოში თანამედროვე ხელოვნების მნიშვნელობისა და მისი პოტენციალის წარმოჩენა. გამოფენას ორგანიზება გაუწია საგანმანათლებლო ორგანიზაციამ „კამპუსი".

გამოფენა იმართება ვერა ფაღავას პარიზის კულტურული ასოციაცია, თბილისის სახელმწიფო აბრეშუმის მუზეუმი და ნინო ტარასაშვილის კერძო კოლექცის მხარდაჭერით. გამოფენა დღეს გაიხსნა და კიდევ ორი დღე გაგრძელდება. გამოფენაზე დასწრების საშუალება მოპატიჟებულ სტუმრებს შეეძლებათ.